يعقوب مجاهد وايي، چې پر ديني مراکزو په ترسره شويو بريدونو کې تاجکستانيان او پاکستانيان لويه ونډه لري.
د افغانستان د ملي دفاع سرپرست وزير ملا یعقوب مجاهد دا څرګندونې د امنيتي او تصفيوي کميسون په خبري ناسته کي وکړې.
ښاغلي مجاهد زياته کړه چې پر مساجدو، خانقاو، ديني مدارسو او علماؤ باندي په ترسره شويو بريدونو کې لويه ونډه د تاجيکستان او پاکستان ده.
د نوموړي په خبره چې د امنيتي ځواکونو په عملياتو کې لسګونه تاجکستانيان وژل شوي او لسګونه نور بيا ژوندي نیول شوي دي.
د ملي دفاع سرپرست زياته کړه چې په هيواد کې د امنيتي ګډوډيو په تنظيم کې دوهم لاس د پاکستان دې او ددې هيواد شل شرير اتباع يې وژلي او سلګونه يې ژوندي نيولي دي.
يعقوب مجاهد په خپلو خبرو کې وويل چې امارت په بشپړ ډول د دوحې تړون ته ژمن دی او چاته به اجازه ورنکړي چې دا خاوره د نورو ملکونو په وړاندي وکاروي.
يعقوب مجاهد زیاتوي چې هيچاته به اجازه ورنکړو چې افغان ځوانان د نورو په خلاف وکاروي او له مجبوريته يې غلطه استفاده وکړي.
دا په داسې حال کې ده چې تېره اوونۍ د پاکستان د بهرنيو چارو وزيري ممتاز زهرا بلوڅ ويلي وه چې اوس هم په افغانستان کې د پاکستان مخالف ترهګر روزل کېږي او هغوی ته پټنځايونه ورکول شوي دي.
همدارنګه د ممتاز بلوڅ د څرګندونو څخه يوه ورځ وروسته د پاکستاني پوځ په يوه ناسته کې هم اړوندې موضوع ته اشاره شوې وه، د پاکستان پوځ ويلي وه چې ترهګرو ته پرمختللي وسلې له افغانستانه راځي، هغوی همدرانګه ويلي وه چې د خپلو مخالفينو او د هغوی د ملاتړو پر خلاف به ډېر ژر نوي اقدامات تر سره کړي.
