جنوبي پښتونخوا په کويټه ښار کې د پښتون ژغورني غورځنګ د مرکزي کمېټۍ دوه ورځنۍ غونډه د دې غورځنګ د مشر منظور احمد پښتین په مشرۍ کې تر سره شوه.
د پښتون ژغورنې غورځنګ د رسنيو څانګې پرون (دونۍ/دوشنبه د غبرګولې پر ۱۴مه او د جون پر ۳مه نېټه) پر خپله فېسبوک پاڼه ليکلي چې په ياده غونډه کې له نورو ډېرو پريکړو سره سره د منظور پښتین او نورو غړو لخوا يو څو بنسټيزې تنظيمي پريکړې شوي دي.
د دې غورځنګ لخوا څلور پرېکړې شوي چې په لاندې توګه ورته د غورځنګ د رسنيو لخوا تشريح ورکول شوې ده.
لومړی: د زده کوونکو (طالب علمانو) غړيتوب، پښتون ژغورني غورځنګ به په ښوونځيو، پوهنتونونو او ټولو تعليمي څانګو کې د زده کوونکو غړیتوب کوي.
دوهم: ښځينه غړيتوب، دغه غورځنګ ليکلي چې پښتون ژغورني غورځنګ د پښتنو خويندو له پاره د غړيتوب عمل ښه په منظمه توګه پر مخ وړي، چې دغه کار به د مرکزي کمېټۍ د غړې اغلې نسيمه مندوخېل په مشري کې کيږي.
درېيم: وکلا فورم، پښتون ژغورني غورځنګ په خپل تنظيم کې خپلو وکيلانو ته برخه ورکوي. او د دغه غورځنګ په خبره يوه منظمه قانوني څانګه به جوړوي.
څلورم: د شمالي وزيرستان جلسه، پښتون ژغورني غورځنګ به د لوی اختر څخه وروسته په شمالي وزيرستان کې د پښتونخوا وطن د روانو حالاتو په تناظر کې يوه لويه ولسي مزاحمتي جلسه کوي.
| د منظور پښتين ټپه او د زرګونو خلکو څرګندونې
دا په داسې حال کې ده چې د پښتون ژغورنې غورځنګ د څو مياشتو راهيسي په تنظيمي چارو مصروف دی، د دغه غورځنګ سره د همکارو رسنيو د راپورونو له مخې د پښتون ژغورنې غورځنګ مشر منظور پښتين او ور سره مرکزي کمېټۍ د خيبر او جنوبي پښتونخوا ټولو ولسوالیو، ناحيو او کليو ته سفرونه کوي او د يوه منظم جوړښت لپاره هڅې کوي.
