د پروان ولايت څخه سرچينې وايي چې د سالنګ تونل د ډېرې واورې او سخت توپان له کبله د تګ راتګ پر مخ تړل شوی دی.
سرچينو رسنيو ته ويل چې د سالنګ تونل نن د خالي/شنبې په ورځ د سلواغې ۱۴مې نېټې په سهار پر مهال تړل شوی دی.
سرچينې زياتوي چې پر دې لاره هر ډول تګ راتګ بند شوی دی، طالبانو هم د دې تونل د تړل کېدو خبر تاييد کړی دی.
د سالنګ د لویې لارې د امنیت آمر محمد اغا حکیم وايي، دوی له هېوادوالو غوښتي چې تر بلې خبرتیا پورې دې پر دې لویه لاره تګ راتګ نه کوي.
د سالنګ تونل ډېره لويه لاره ده چې ډېر شمالي ولايتونه د کابل سره نښلوي، چې هر کال د واورې اورېدو له کبله د څو اوونيو لپاره تړل کېږي.
تر دې وړاندې هم دغه لاره د بيا جوړونې په موخه څو اوونۍ تړل شوې وه چې د شمال طرف موټرو د ميدان وردګو ولايت په طرف پر کچه لارو تګ راتګ کاوه.
