نړيوال بانک څخه په يوه خپره شوې اعلامیه کې راغلي چې دا بانک به په افغانستان کې د انرژۍ د ليږد کاسا ۱۰۰۰ پروژې چاري بيا پيل کړي.
نړيوال بانک د کاسا ۱۰۰۰ په اړه په دغه بيان کې ويلې چې د بانک اجرايوي مديره پلاوي د افغانستان د خلکو څخه د ملاتړ په موخه د ۳.۰کړنلاري په نوم يوه لايحه هم تصويب کړې.
د نړيوال بانک اعلاميه زياتوي چې د کاسا۱۰۰۰ پروژې کار به د افغانستان د درېيو ګاونډیو هيوادونو په غوښتنه پيل شې، تر څو يوې سرګرداني شتمنۍ ته ددې پروژې د بدلېدو له خطر څخه مخنيوی وشي.
نړيوال بانک ټینګار کړی چې د یادې پروژې کار به داسې پیل شي چې دا تضمین شي چې د جوړولو ټول مصارف او راتلونکي عواید به یې له افغانستانه بهر مدیریت شي او د طالبانو له لاسرسۍ څخه به لیرې وي.
کاسا-۱۰۰۰ د ۱،۲ میلیارد ډالرو په ارزښت له تاجکستان او قرغزستان څخه د افغانستان له لارې پاکستان ته د انرژۍ د لېږد پروژه ده.
نړیوال بانک په دغه اعلاميه کې ویلي چې په درېیو نورو هېوادونو کې د دې پروژې کار تقریبا پای ته رسیدلی او یوازې په افغانستان کې لاهم نيمګړی پاتي دی.
د کاسا۱۰۰۰ پروژې چاري په افغانستان کې د طالبانو له بیا واکمنېدو څه موده وروسته ودرول شوې، خو اوس نړيوال بانک د بيا پيل خبر ورکړی.
د نړيوال بانک په ملاتړ د کاسا۱۰۰۰ پروژې له لارې به ۱۳۰۰ میګاواټه برېښنا له تاجکستان او قرغزستان څخه افغانستان ته او ۱۰۰۰ میګاواټه برېښنا پاکستان ته ورکړل شي.
طالبانو که څه هم د نړيوال بانک ددې خبر په ورکولو څه ندي ويلې خو وړاندي يې له نړيوال بانک او ټولو بهرنیو بنسټونو څخه غوښتي وه چې خپلې نیمګړې پروژې بشپړي کړي.
د تير جمهوري نظام پر مهال ويل شوي وه چې د کاسا۱۰۰۰ پروژې له لاري به د افغانستان بوديجې ته په کلني ډول د ۴۰ تر ۴۵ ميليونه ډالر عايد جمع شې.
هيره دي نه وي چې په ۲۰۲۰ کال کې، د افغانستان پخواني ولسمشر محمد اشرف غني، د کاسا-۱۰۰۰ برېښنا پروژې د عملي کار پرانیسته وکړه او ویې ویل چې دا پروژه د افغانستان د اقتصاد لپاره یوه نوې دروازه ده.
