جاپان په ملګرو ملتونو کې د افغانستان د بشري مرستو له صندوق سره د شپږ ميليونو ډالرو نوره مرسته وکړه.
د ملګرو ملتونو د بشري مرستو د همغږۍ ادارې اوچا په روان کال کې د افغانستان د بشري مرستو صندوق سره د جاپان د شپږ ميليونه ډالرو مرستې څخه مننه کړې ده.
اوچا تېره ورځ په خپله ایکس پاڼه کې په دې اړه نور جزییات نه دي ورکړي، خو جاپان چې د افغانستان یو سترمرستندویه بلل کیږي؛ له دې مخکې یې هم د ملګرو ملتونو د مختلفو ادارو له لارې په دې هېواد کې له اړو کسانو سره د ملیونونو ډالرو مرسته کړې ده.
د افغانستان لپاره د خوړو نړیوال پروګرام ډبليو ايف پي د روان کال د فبرورۍ په دوهمه د جاپان د حکومت د ۱۳ نیم ملیون ډالرو د مرستې خبر هم ورکړی و.
ډبیلو ایف پي ويلې چې ددې پروګرام سره د جاپان د دريو کلنو مرسته ۷۳ ميليونه ډالرو ته ورسېده.
اوچا ويلې لاهم په افغانستان کې د ۱۵ ميليونه بې وزله او کډوالو لپاره ۹۰ ميليونه ډالرو ته اړتيا لري.
