د اتریش پولیس وايي، د دغه هېواد په پلازمېنه ویانا کې یې یو ۲۷ کلن افغان د دریو ښځو د وژلو په تور نیولی دی.
د اتريش د پولیسو ویاند (فیلیپ هاسلینګر) ويلي چې دا درې میرمنې د جمعې په ورځ د ویانا په بریګیتناو کې په یوه رنډۍخونه (فاحشهخانه) کې دننه په چاقو وژل شوې وې.
د هغه په وينا، د پېښې ځاى ته څېرمه يو تن له چاقو سره نيول شوى دى.
پولیسو د جزیاتو له ورکولو پرته زیاته کړې چې نیول شوی کس افغان کډوال دی چې په دغه رنډۍخونه کې تر څلور ساعته وخت تېرولو وروسته يې دغه ښځې وژلي دي.
د سکای نیوز د راپور له مخې له دغه پناه غوښتونکي څخه پوښتنې ګروېږنې کیږي.
چارواکو په دغه رنډۍخونه کې د وژل شویو کسانو د هویت په اړه څه نه دي ویلي.
د يادونې وړ ده چې په اتریش هېواد کې د رنډۍخونو فعاليتونه قانوني دي.
په ورته وخت کې، د اتریش پولیسو اعلان کړی چې دوی په ویانا کې د یوې ۵۱ کلنې میرمنې جسد د هغې له ۱۳ کلنې لور سر يو ځای پيداکړی دی.
د مالوماتو له مخې دغه دوه تنه غالباً د دغې ښځې د خاوند له خوا وژل شوي دي.
دا په داسې حال کې ده چې په دې وروستیو کې په اروپايي هېوادونو کې د افغان کډوالو له خوا جنايي جرمونه او بریدونه ډېر شوي دي.
په وروستۍ قضیه کې، چې څو ورځې وړاندې د برتانیا پولیسو پر یوې مېرمنې او د هغې پر دوو لوڼو د برید په جرم يو افغان تورن شوی وو، چې په ۲۰۱۶ کال کې دغه هېواد ته په ناقانونه توګه داخل شوی و.
د راپورونو له مخې دغه سړي د لندن په «کلافم» سیمه کې د «الکلین» ډوله موادو په کارولو سره پر دغې ښځې برید کړی و.
