هند د دريو شل اوره لوبلړۍ په لومړۍ لوبه کې افغان لوبډلې ته په شپږو ويکټو ماتي ورکړه او لوبلړۍ يې په بريا پيل کړه.
د هند او افغانستان ترمنځ د شل اوره لوبلړۍ په لمړۍ لوبه کې چې د هند په موهالي کې ترسره شوه هند پچه وګټله او افغان لوبډلې ته یې د توپ وهنې بلنه ورکړه.
په ټاکل شوي شل اورونو کې افغان لوبډلي د پنځو لوبغاړو په زيان ۱۵۸ منډې ترسره کړې او هند ته يې ۱۵۹ هدف ورکړ.
د افغانستان لپاره په ياده لوبه کې محمد نبی ۴۲ او عظمت عمرزي ۲۹ ډېري منډي وکړې.
د هند لپاره په بالینګ کې مکېش کمار او اکثر پټيل دوه- دوه او شيوام ډوبي يوه ویکټه ترلاسه کړه.
هند کرکټ ملي لوبډلي د څلورو لوبغاړو په زيان ياد هدف په ۱۷.۳ اورونو کې پوره کړ او افغان لوبډلي ته يې ماتي ورکړه.
د هند لپاره شيوام ډوبي ۶۰ او جتيش شرما ۳۱ ډيرې منډي وکړې.
افغان لوبغاړي مجيب الرحمن بيا په ټاکل شويو څلورو اورونو کې د ۲۱ منډو په ورکولو سره دوه او عظمت عمرزي د ۲۵ منډو په ورکولو سره يو لوبغاړی وسوځوی.
ټاکل شوې ده چې د هند او افغانستان د يادي لوبلړۍ دوهمه لوبه به د يک شنبې په ورځ په انډور کې او دريمه لوبه د چهارشنبې په ورځ په بنګلور کې ترسره شې.
د يادونې وړ ده چې يادي لوبي د ۲۰۲۴ نړيوال جام ته چمتوالي په موخه ترسره کېږي او افغان لوبډله به د هند وروسته د سريلانکا او بيا له ايرلنډ سره هم ورته لوبلړۍ ولري.
