په اروزګان کې سرچينې وايي، چې ناپېژاندو وسله والو په دې ولايت کې يو پخوانی نظامي وژلی او بيا له سيمي تښتېدلې دي.
سرچينې پرون درېنۍ/سهشنبه ناوخته رسنيو ته ويلي، دا سړی پخوانی نظامي وو او د اروزګان په ګيزاب ولسوالۍ کې وژل شوی دی.
د سرچينو په وينا دا پخوانی نظامي ( شاهي ) نومېدئ او تېره شپه په خپل کور کې د نامالومه وسله والو لخوا په ډزو وژل شوی دی.
سرچينه همدارنګه زياتوي چې دا کس په مخکيني حکومت کې پوليس وو او د طالبانو د راتلو سره په خپلو عادي کارونو مصروف وو.
تر اوسه پورې د دغه پخواني نظامي د وژنې دليل مالوم نه دی او طالبانو هم په دې اړه څه نه دي ويلي.
دا په داسې حال کې ده چې په دې وروستيو مياشتو کې د افغانستان په بېلابېلو ولايتونو کې په موخيزو وژنو کې زياتوالی راغلی دی.
د دې څخه وړاندې تازه په فارياب کې يو پخوانی نظامي وژل شوی وو او ورپسې د انګليسي ژبې يو استاد هم د نامالومه وسله والو لخوا د کابل په نوي ښار کې وژل شوی وو.
ويل کېږي چې يو شمېر هېوادوال د پخوانيو نظامي کسانو د وژنو د پېښو عاملين طالبان يادوي خو طالبان دغه ادعاوې وخت په وخت ردوي او وايي چې د خپل مشر د عمومي عفوي فرمان ته احترام لري.
